എന്റെ മുഴുവന്‍ പേര് മുഹമ്മദ് കുട്ടി തോണിക്കടവന്‍. മമ്മൂട്ടി കട്ടയാട് എന്നത് തൂലികാ നാമമാണ്.
എന്റെ ഗ്രാമം:
വയനാട് ജില്ലയിലെ മാനന്തവാടി താലൂക്കിലെ വെള്ളമുണ്ട പഞ്ചായത്തിലെ കട്ടയാട് സ്വദേശി. പോസ്റ്റ് ഓഫീസ്: തരുവണ. (ബത്തേരിക്കടുത്തും ഒരു കട്ടയാടുണ്ട്). ഞങ്ങളുടെ മഹല്ലിന്റെ പേരാണ് കട്ടയാട്. വെള്ളമുണ്ട എട്ടേനാലും യഥാര്‍ത്ഥത്തില്‍ കട്ടയാടാണ്. കട്ടയാട് പോസ്റ്റ് ഓഫീസ് എട്ടേനാലിലാണ് സ്ഥിതി ചെയ്യുന്നത്. മാനന്തവാടി താലൂക്കിലെ പല പ്രദേശങ്ങളും മൈലുകളുടെ അടിസ്ഥാനത്തില്‍ പിന്നീട് അറിയപ്പെട്ടതിനാല്‍ കട്ടയാട്, പൊരുന്നന്നൂര്‍, ഇടവക തുടങ്ങിയ പഴയ പേരുകള്‍ രേഖകളിലൊതുങ്ങി നില്‍ക്കുകയാണിപ്പോള്‍. ഏഴാം മൈല്‍, ഏഴേ നാല്‍, കോക്കടവ്, എട്ടേനാല്‍ എന്നീ പേരുകളിലൊക്കെയാണ് ഇപ്പോള്‍ കട്ടയാട് അറിയപ്പെടുന്നത്. എന്റെ വീടിന്റെ അഡ്രസ്സ് ചോദിച്ചാല്‍ ഞാനിപ്പോള്‍ പറയുക “ഏഴേ നാലില്‍ ബസ്സിറങ്ങി കോക്കടവിലേക്കു നടക്കുക എന്നാണ്”. ഏഴേനാല്‍ എന്നാല്‍ മാനന്തവാടിയില്‍ നിന്നും ഏഴു മൈല്‍ നാല്‍ ഫെര്‍ലോങ് ദൂരത്ത് സ്ഥിതി ചെയ്യുന്നു എന്നര്‍ത്ഥം. ഏഴേ നാലിന് ചാല്‍ (ചാലില്‍) എന്നൊരു പഴയ പേരുണ്ട്. കട്ടയാട് ഏഴേ നാല്‍ എന്നും കട്ടയാട് എട്ടേനാല്‍ എന്നും വെവ്വേറെ വേര്‍തിരിക്കുന്നവരുമുണ്ട്. കട്ടയാട് എന്നത് മുമ്പ് കാലത്തെ ഏതെങ്കിലുമൊരു നായര്‍ തറവാടൊക്കെ ആയിരിക്കാനാണ് സാധ്യത. ഒരു നൂറു കൊല്ലം മുമ്പത്തെ ചരിത്രം കട്ടയാടിനില്ല. എന്നാല്‍ കട്ടയാടിനു ചുറ്റുമുള്ള തരുവണ, പള്ളിക്കല്‍, പഴഞ്ചന തുടങ്ങിയ പ്രദേശങ്ങള്‍ക്ക് നൂറ്റാണ്ടുകള്‍ പഴകിയ ചരിത്രമുണ്ട്.